編採營

19-21 APR 2013

(口語才能原汁原味)

一路都覺得童軍啲露營有啲變態，逼人將全間屋帶去營地果度起，係訓練到團結但真係有啲攰，勢估唔到俾我遇到一個更變態嘅camp，真係天外有天。三日兩夜宿營，個背囊重過去露營幾倍，裝左電腦相機腳架之類的身家性命財產，覺得自己好誇張啦，點知返到學校見到大家係拖篋黎，安心晒(零邏輯)。

其實去之前幾日冇停過雨，勁驚整濕晒啲機，尤其是問學校借果啲，真係賠唔起。入到營地就開始落雨，唔該晒，settle好點算下，原來我地帶左十二部電腦八部相機，咁一組計埋老豆呀媽都係得十四個人，傻的嗎，仲有成部100吋iMac(唔知呢d機應該幾多吋)搬入西貢，真係好把炮，不過事實證明呢堆野全部都係有用，好恐怖。

垃圾場

好彩冇漏電

頭兩日不斷響個營地入面跑新聞，我第一次覺得「不斷」呢個形容詞係咁貼切。通常跑完一單新聞返到屋企，啱啱篤左張SD card入電腦過片，個walkie又響，我頂你仲要同我講2分鐘後山腳就有新聞喇，你地快啲捧住部相機連腳架再連住支咪加一pat電線趕過黎啦，不過天雨路滑，我地沿途會有人提你唔好跑，但新聞呢啲野唔等人架。麥理浩呢個營地又係唔合作，咁_多超級無敵大斜路做乜_？我地間屋前面有一段斜路，用階磚舖的，我唔明點解成個營地都係石屎路，係得呢個位用階磚？落雨真係跣到pk。於是大家竟然好懷念烏溪沙。

開頭幾次採訪都會有啲緊張，驚唔識問問題，但到左第一日夜晚已經唔知乜野叫緊張，淨係知道跑，扑咪，show咪牌，大野就做扒，然後走返房打稿。忙到一個點係冇時間諗自己應該做乜野，明明就有好多野做，再加上一晚三點幾一晚(其實係朝)六點幾訓，完全唔知自己做緊乜春秋。我地組通常係兩個人一pair出去跑新聞，一個揸機拍片，一個揸錄音筆問野，好佩服負責揸機嘅人，明明個個都係瘦弱小女子，拎住部單反連腳架都照跑瘋狂落斜，反而我因為要衝快啲去問問題同錄音，冇幫到手拎機，好衰仔。又要讚下自己組，因為冇fix死partner，基本上一有新聞就要有一個cam-man一個扑咪自己認頭，然後拎野衝出去，奇怪在大家都冇拗交，合作到喊，爸媽又指導有方，很強的組合。雖然做唔到第一，但冇啲無謂是非，非常暢快。

截稿前衝刺！

！黃虎台！

做左咁多野，印象最深刻就係翻譯外電，老老實實讀左幾個月翻譯都唔係好明點譯野，但響營入面一共用左五個幾鐘譯左兩篇千字文出黎，我開始明白到么么講乜，就係譯野唔洗跟足嘅，考試除外。仲有就係做法庭新聞果時單拖出去，因為我地決定左放落報紙，唔洗拍片，所以派一條友去抄下野。響法庭抄完野出黎趕住採訪啲律師同証人，見到啲主角已經行緊出黎，趕唔切放本簿入袋就求其放左響遮架上面，點知訪問完行返去發現本簿唔見左，果下真係嚇Q死我！本簿抄晒頭先響法庭度講嘅野，大佬得一條友無料就係無料，冇得話互補喎，唔通俾其他組拎走左咁賤？！好多念頭爆出黎果時有個職員響我後面問︰「本簿你架？唔好亂咁放野啦！！」佢一路哦哦哦一路俾返本簿我，果刻我覺得自己真係ON9無極限，點解會蠢到將自己條命就咁放響街邊，痴孖根，以後不會再犯。

成個camp有啲唔暢快位就係，明明講好左戲子們一搣走label，佢就唔再係曾駿驊，做返個普通人，唔可以再追問，點解會因為一個人講一句野你地就貼_返晒啲label？！因為咁我跑多左好_多斜路，諗住條新聞完左上返屋企啦，又話貼返個label採訪繼續，又要狗衝落返斜路。頂你知唔知咩叫規矩，定左就咪撚臨時轉啦。雖然係溝通問題，好多野你地話唔到事，但呢啲野講出黎都係想有改善啫。

不得不提麥理浩canteen的食物，自問一入camp就會啟動「camp mode」，即係啲野食幾難食都食得落，以前試過露營煎完塊扒有啲草響上面，唔知係跌過落草定點，因為唔准浪費食物，大家都硬食左。但呢度啲飯真係無敵，呈不規則球狀，好有嚼勁。有晚實在頂唔順，諗住加啲湯變做湯飯易食啲，一秒之後就後悔了。啲湯其實係一煲表面有層油的水，加埋啲飯球，畢生難忘。

去完編採營，確定左自己對文字比電子更有興趣，雖然好多人都話你要得柯仔歡喜先好入平面，不過唔理得咁多，一路都覺得如果自己讀嘅野唔啱口味，GPA高到曉飛都冇用。以前唔鐘意理科，就用一日時間溫phychembio，俾晒啲時間落中史history度，都係興趣主導，無理由幾年後竟然為左迎合其他人意願黎揀野讀掛。睇文摘話，一世人有廿年係讀書，四十年係工作，如果讀書讀埋啲唔鐘意嘅書，咁之後四十年都唔方會開心，因為人生係串連嘅，所有野都有因果。暫時定左個目標俾自己跟下，話唔定有一日突然發現final cut pro同premiere原來都好好玩。

生活的零件在同一時間罷工

四月，開始要擔心project和final的月份。

半年來沒有閱讀過一本有內容的書，於是寫作功力退步，不懂得用文字表達自己，不願意去思考，開始懷疑自己選錯了路，不能堅持到最後。就像一台機器，一月開學，二月適應，三月mid-term，四月project，五月final，六月sem break。九月開學，如此類推。每天也在學習，但學校的習令人荒廢了思考，腦袋呼喊著要新的智慧，身體卻被schedule上的死線束縛，不能脫身。我需要學校教我寫新聞的技巧，也需要從書本借來的智慧來寫作，而每天活動時間只有十六小時，到底應該如何逃離這種處境？

性格衝動、容易緊張的人應該要relax，因為這是唯一的解決辦法。但這種人會因為憂慮自己不能relax，緊張到不能plan應該如何relax。當你發現每件事都有很多細節需要擔心時，你會擔心自己能否頂得順這些憂慮，繼而在一個四月的晚上仰望著天花板好久好久。