呢幾個問題成日都會響網上見到，問嘅人都會好真誠地期待其他人會俾個答案佢，甚至會瘋狂重覆問題，驚死人地睇唔到答佢唔到。究竟呢啲人個腦生左響邊度？
我想講嘅係，Google map已經出現左架喇大佬，人地成個地址放左出黎你咪copy完paste響google map果條search bar度，唔洗一秒佢已經幫你將成個畫面係香港zoom到得返你個目的地，仲想點？仲問點去？睇下隔離有冇地鐵站火車站囉！有嘅話人地都寫明個出口係A1你仲問問問！冇？禁下附近啲藍色小正方形睇下有咩巴士小巴會經囉！OK當你唔知呢粒藍色點係乜東東，知唔知香港有九巴？又知唔知香港有小巴？你上去http://www.kmb.hk/tc/用點對點搜尋已經搞掂啦，小巴又有http://www.minibus.hk/，仲識唔識去呀？「哇乜要轉車架？」「出左地鐵站仲要行十分鐘？」咁你留返響屋企啦。
如果係爸媽果輩問「唔識去，可唔可以幫我check？」係好正常，佢地接觸電腦冇耐，啱啱先學完開機同熄機冇理由一跳就跳到去互聯網掛，但作為一個朝早對住部smartphone夜晚攬住部電腦嘅年青人，唔好同人講你唔識上網！唔好下下問人呢度點去果度點去！係咪咩都要人俾答案你？咁你個腦生黎做乜？不如割左佢出黎裝返塊主機板落去，話唔定行得順暢啲添。
而家啲人成日話︰「我要行出自己條路！」咁你諗住搭咩車，行邊條路呀？相信答案都係「唔知喎，上網問下人先」。由荃灣出銅鑼灣咁簡單嘅路你都要問人，人生果條路你可以點自己行？如果你未適應/唔想適應「自己搵答案」嘅模式，咁你都係向住醫生律師(即係你阿爸阿媽幫你排好果條路)前進啦，失敗左嘅話，恭喜你有機會學行，成功你咪一世都唔識自己行囉，係咁架喇人生！
係呀我仲係年青人，不過講到教pre-teen就變到阿婆咁噚氣架喇！係咁煩架喇領袖！
